ಭಾರತಾಚೆ ಅಪ್ರತಿಮ್ ಮುಕೆಲಿ, ಮಹಾತ್ಮಾ ಗಾಂಧಿ ಆನಿ ಲಾಲ್‌ಬಹುದ್ದೂರ್ ಶಾಸ್ತ್ರಿ ಹಾಂಚ್ಯಾ ಜಲ್ಮಾದಿಸಾಚ್ಯಾ ಸುವಾಳ್ಯಾರ್‌ ಆಜ್ (ಅಕ್ಟೋಬರ್ 2) ಕಥೊಲಿಕ್ ಸಭಾ, ಬಾರ್ಕುರ್ ಘಟಕಾನ್ 'ನಿತಳ್ ಪರಿಸರ್ ಅಭಿಯಾನ್' ಚಲವ್ನ್ ವ್ಹೆಲೆಂ.
ಹಾಚೊ ವಾಂಟೊ ಜಾವ್ನ್ ಸಕಾಳಿಂ 8 ವರಾರ್ ಥಾವ್ನ್ ಇಗರ್ಜೆಕಂಪೌಂಡಾಚ್ಯಾ ತೀನ್‌ಯೀ ಕುಶಿಂನಿ ಆಸ್ಚೆಂ ವೋಡ್ತ್ ಆನಿ ಇಗರ್ಜೆಮುಕ್ಲೊ ಜಾಗೊ ನಿತಳ್ ಕೆಲೊ. ಫಿರ್ಗಜ್ ವಿಗಾರ್ ತಶೆಂಚ್ ಘಟಕಾಚೊ ಅತ್ಮಿಕ್ ದಿರೆಕ್ತೊರ್, ರೊನಾಲ್ಡ್ ಮಿರಾಂದಾ ಬಾಪಾಂನಿ ಆಪ್ಲ್ಯಾ ಖುಶಾಲ್ಭರಿತ್ ಮೆತೆರ್ಪಣಾವರ್ವಿಂ ಸಾಂದ್ಯಾಂಕ್ ಹುಮೆದ್ ಭರ‌್ಲಿ. ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್, ಕಾರ್ಯದರ್ಶಿ ಆನಿ ಫಿರ್ಗಜ್ ಗೊವ್ಳಿಕ್ ಆಯೊಗಾಂಚೊ ಸಂಯೋಜಕ್ ಹಾಣೀಂಯ್ ಹ್ಯಾ ಅಭಿಯಾನಾಂತ್ ತಾಂಚೊ ಸಾಂಗಾತ್ ದಿಲೊ. ಕಥೊಲಿಕ್ ಸಭೆಚೆ ಸಾಂದೆ ನ್ಹಯ್ ಆಸ್ತಾಂ, ಬರ‌್ಯಾಮನಾಚೆ ಫಿರ್ಗಜ್‌ಗಾರ್‌ಯೀ ಹ್ಯಾ ನಿತಳಾಯೆಚ್ಯಾ ಕಾರ್ಯಾಂತ್ ವಾಂಟೆಲಿ ಜಾಲ್ಲೆ. ಘಟಕ್ ಅಧ್ಯಕ್ಷ್ ಮಾನೆಸ್ತ್ ಪಿಯುಸ್ ಜೇಮ್ಸ್ ಡಿಸೋಜಾ ಆನಿ ಘಟಕ್ ಕಾರ್ಯದರ್ಶಿ ಮಾನೆಸ್ತ್ ರಿಪ್ಪನ್ ಡಿಸೋಜಾ ಹಾಂಚ್ಯಾ ಮುಕೆಲ್ಪಣಾರ್ ಹೆಂ ಅಭಿಯಾನ್ ಚಲ್ಲೆಂ.
