ಸಾಂ ಪೆದ್ರುಕ್ ಸಮರ್ಪಿಲ್ಲ್ಯಾ ಬಾರ್ಕುರ್ ಫಿರ್ಗಜೆಂತ್ ಆಜ್ (ಜೂನ್ 29, 2025) ಪಾತ್ರೊನ್ ಫೆಸ್ತಾಚೊ ದೀಸ್.
ಸಾಂ ಪೆದ್ರು ಮಾರಿಫಾತ್ ದೆವಾನ್ ಕೆಲ್ಲ್ಯಾ ಉಪ್ಕಾರಾಂಕ್ ಅರ್ಗಾಂ ಪಾಟಂವ್ಚೊ ದೀಸ್.
ಪಾತ್ರೊನ್ ಫೆಸ್ತಾಚೊ ಸಂಭ್ರಮ್ ವರ‌್ತ್ಯಾ ಗದ್ದಳಾಯೆನ್ ಆನಿ ಭಕ್ತಿಪಣಾನ್ ಆಚರ‌್ಸಿಲೊ. ಹ್ಯಾ ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾಂತ್ ವಾರಾಡ್ಯಾಚೆ, ಫಿರ್ಗಜೆಂತ್ಲೆ ಆನಿ ಸಯ್ರ್ಯಾ ಯಾಜಕಾಂಚಾ ಹಾಜರ‌್ಪಣಾನ್ ಮಿಸಾಚಿ ವೆದಿ ಸೊಭ್ಲಿ.
ವಿಗಾರ್ ರೊನಾಲ್ಡ್ ಮಿರಾಂದಾ ಬಾಪಾಂನಿ ಸಂಭ್ರಮಿಕ್ ಮಿಸಾ ಪಯ್ಲೆಂ ಫಿರ್ಗಜ್ ಹೊಲಾಚಾ ನವೀಕರಣಾ ಪಾಸತ್ ರೂ 10,000 ಆನಿ ಚಡಿತ್ ದಾನ್ ದಿಲ್ಲ್ಯಾಂಕ್ ತಶೆಂಚ್ ಫೆಸ್ತಾಚೆ ಮುಡ್ದೊಮ್ ದಿಲ್ಲ್ಯಾಂಕ್ ಮಾನಾಚ್ಯೊ ವಾತಿ ದೀವ್ನ್ ಮಾನ್ ಪಾಟಯ್ಲೊ.
ಪವಿತ್ರ್ ಮಿಸಾಚಾ ಬಲಿದಾನಾಚೆಂ ಮುಖೇಲ್ಪಣ್ ಉಡುಪಿ ದಿಯೆಸೆಜಿಚೆ ಚಾನ್ಸಲರ್ ಬಾಪ್ ಸ್ಟೀವನ್ ಡಿಸೋಜ ಹಾಣಿಂ ಘೆವ್ನ್ ಜೊಕ್ತೊ ಸಂದೇಶ್ ದಿಲೊ. ಹಾಜರ್ ಆಸ್‌ಲ್ಲ್ಯಾ ಸರ್ವ್ ಯಾಜಕಾಂಚಾ ತರ್ಫೆನ್ ದಿಯೆಸೆಜಿಚೆ ವಿಗಾರ್ ಜೆರಾಲ್ ಆನಿ ಮೊನ್ಸಿಂಜೊರ್ ಬಾಪ್ ಫರ್ಡಿನಾಂಡ್ ಗೊನ್ಸಾಲ್ವಿಸ್ ಹಾಣಿಂ ಸರ್ವಾಂಕ್ ಬರೆಂ ಫೆಸ್ತ್ ಮಾಗ್ಲೆಂ.
ಮಿಸಾ ಉಪ್ರಾಂತ್ ಫಿರ್ಗಜ್ ವಿಗಾರ್ ಬಾಪಾಂನಿ ಪಾತ್ರೊನ್ ಫೆಸ್ತಾಚೆಂ ಪಿರ್ಜೆಂತ್ಪಣ್ ಘೆತ್‌ಲ್ಲ್ಯಾ ಬೆನೆಡಿಕ್ಟಾ ಮ್ಯಾಕ್ಸಿಮ್ ಸಿಕ್ವೇರಾ ಆನಿ ಕುಟಾಮ್ ಹಾಂಕಾಂ ಮಾನ್ ಪಾಟಯ್ಲೊ. II PUCಂತ್ ನೊವೆಂ ರ‌್ಯಾಂಕ್ ಆಪ್ಣಾಯಿಲ್ಲ್ಯಾ ಜೆಸ್ಟನ್ ಡಾಯಸ್ ತಶೆಂಚ್ SSLCಂತ್ 95% ಆನಿ ಚಡಿತ್ ಮಾರ್ಕ್ಸ್ ಆಪ್ಣಾಯಿಲ್ಲ್ಯಾ ಭುರ್ಗ್ಯಾಂಕ್ ರೀನಾ ಹ್ಯಾರಿ ದಾಲ್ಮೇದಾ ಹಾಣಿಂ ಸ್ಕೊಲರ್‌ಶಿಪ್ ದಿಲೆಂ.
ಸಂಭ್ರಮಿಕ್ ಮಿಸಾ ಉಪ್ರಾಂತ್ ನವೀಕೃತ್ ಹೊಲಾಚೆಂ ಆಶೀರ್ವಚನ್ ಕಾರ್ಯೆಂ ಮೊನ್ಸಿಂಜೊರ್ ಬಾಪಾಂಚ್ಯಾ ಮುಖೇಲ್ಪಣಾರ್ ಚಲ್ಲೆಂ.
Pictures by : Herbert Menezes, Barkur
