ಬಾರ್ಕುರಾಂತ್ ಮೊಂತಿ ಫೆಸ್ತಾಚೊ ಸಂಭ್ರಮ್ ವ್ಹಡಾ ಗದ್ದಳಾಯೆನ್ ಆಚರಣ್ ಕೆಲೊ. ಮಾನೆಸ್ತಿಣ್ ರೋಜಿ ಮೆಂಡೊನ್ಸಾಗೆರ್ ಭಾತಾಚ್ಯಾ ಕಣ್ಸಾಂಚೆರ್ ಆಶೀರ್ವಾದ್ ಘಾಲ್ನ್, ತಿಂ ಕಣ್ಸಾಂ ಬೆಂಡಾರ್ ಆನಿ ದಬಾಜಿಕ್ ಪುರ್ಶಾಂವಾರ್, ಭುರ್ಗ್ಯಾಂನಿ ಆನಿ ಸ್ತ್ರೀಯಾಂನಿ ಫುಲಾಂ ಅರ್ಪುಂಚಾ ಸವೆಂ ಇಗರ್ಜೆಕ್ ಹಾಡ್ಲಿಂ.
ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾಚೆಂ ಮುಖೇಲ್ಪಣ್ ಬಾಪ್ ವಿನ್ಸೆಂಟ್ ಫೆರ್ನಾಂಡಿಸ್ ಹಾಣಿಂ ಘೆವ್ನ್, ಮಾನಾದಿಕ್ ದೊತೊರ್ ಬಾಪ್ ಐವನ್ ದಾಲ್ಮೇದಾ ಆನಿ ವಿಗಾರ್ ಬಾಪ್ ರೊನಾಲ್ಡ್ ಮಿರಾಂದಾ ಹಾಣಿಂ ಸಹ-ಭೆಟವ್ಣಿ ಕೆಲಿ. ಮಾನಾದಿಕ್ ದೊತೊರ್ ಬಾಪ್ ಐವನ್ ದಾಲ್ಮೇದಾ ಹಾಣಿಂ ಅರ್ಥಾಭರಿತ್ ಸಂದೇಶ್ ದಿಲೊ. ಮಿಸಾ ಉಪ್ರಾಂತ್ ಹಾಜರ್ ಜಾಲ್ಲ್ಯಾ ಸರ್ವಾಂಕ್ 'ನೊವೆಂ' ವಾಂಟ್ಲೆಂ. ಮಿಸಾಚಿ ಲಿತುರ್ಜಿ ಆನಿ ಕೊಯರ್ ಫಿರ್ಗಜೆಚ್ಯಾ ಭುರ್ಗ್ಯಾಂನಿ ಚಲವ್ನ್ ವ್ಹೆಲಿ.
ಬಾಪ್ ವಿನ್ಸೆಂಟ್ ಫೆರ್ನಾಂಡಿಸ್ (ವಿಗಾರ್ ಬಾಪಾಂಚೊ ಮಾವ್ಳೊ) ಹಾಣಿಂ ಆಪ್ಲೊ 75ವೊ ಜಲ್ಮಾದೀಸ್ ಆಚರಣ್ ಕೆಲ್ಲ್ಯಾ ವಗ್ತಾ, ಫಿರ್ಗಜ್‌ಗಾರಾಂ ತರ್ಫೆನ್ ಶುಭಾಶಯ್ ಪಾಟವ್ನ್ ಮಾನ್ ಕೆಲೊ. ಉಪ್ರಾಂತ್ ಬಾಪ್ ವಿನ್ಸೆಂಟ್ ಫೆರ್ನಾಂಡಿಸ್ ಹಾಣಿಂ ಆಪ್ಲೊ ಸಂದೇಶ್ ದಿಲೊ.
ಫೆಸ್ತಾಚೆ ಪಿರ್ಜೆಂತ್ ಜಾವ್ನಾಸ್ಚ್ಯಾ ಮಾನೆಸ್ತಿಣ್ ವಿಲ್ಮಾ ಲುವಿಸ್ ತಶೆಂಚ್ ಮಾನೆಸ್ತ್ ಡೆಸ್ಮಂಡ್ ಸರಿತಾ ಲುವಿಸ್ ಆನಿ ಕುಟ್ಮಾಚ್ಯಾಂನಿ ಹಾಜರ್ ಜಾಲ್ಲ್ಯಾ ಸರ್ವಾಂಕ್ ಮಿಸಾ ಉಪ್ರಾಂತ್ ಫಳ್ಹಾರಾಚಿ ವೆವಸ್ತಾ ಕೆಲ್ಲಿ.
ಹ್ಯಾ ಫೆಸ್ತಾಚೊ ಸಂಭ್ರಮ್ ಯಶಸ್ವಿ ಜಾಂವ್ಕ್, ಫಿರ್ಗಜ್ ಗೊವ್ಳಿಕ್ ಮಂಡಳಿಚೆ ಸಾಂದೆ, ಕೊವೆಂತಾಚಿಂ ಸಿಸ್ಟರಾಂ, ವಾಡ್ಯಾಚೆ ಗುರ್ಕಾರ್, YCS/ICYMಚೆ ಸಾಂದೆ, ವಿವಿಧ್ ಸಂಘಟನಾಚ್ಯಾ ಹುದ್ದೆದಾರಾಂನಿ ಆನಿ ಸಾಂದ್ಯಾಂನಿ ಮೊಟೊ ಸಹಕಾರ್ ದಿಲೊ.
Pictures by : Herbert Menezes
