ಆಜ್ (ಆಯ್ತಾರ್, 13/08/23) ಅಂತರಾಷ್ಟ್ರೀಯ್ ಯುವ ದಿವಸ್ - 2023 ಆಚರಣ್ ಕರ‌್ಚ್ಯಾ ವಗ್ತಾ, ಆಮ್ಚ್ಯಾ ಫಿರ್ಗಜೆಂತ್ YCS ಆನಿ ICYM ಸಂಘಟನಾಚಾ ಸಾಂದ್ಯಾಂನಿ ಸಾಂಗಾತಾ ಮೆಳೊನ್ ಯುವ ಆಯೊಗಾ ಸಂಗಿಂ ಅರ್ಥಾಭರಿತ್ ರಿತಿನ್ ಸಂಭ್ರಮ್ಲೊ.
ಸಕಾಳಿಂಚಾ ಪಯ್ಲ್ಯಾ ಮಿಸಾಚಿ ಲಿತುರ್ಜಿ ಯುವಜಣಾಂನಿ ಚಲವ್ನ್ ವ್ಹೆಲಿ. ವಿಗಾರ್ ಬಾಪ್ ರೊನಾಲ್ಡ್ ಮಿರಾಂದಾ ಹಾಣಿಂ ಅರ್ಥಾಭರಿತ್ ಉತ್ರಾಂನಿ ಸಂದೇಶ್ ದಿಲೊ ಆನಿ ಯುವಜಣಾಂ ಪಾಸತ್ ಪ್ರತ್ಯೇಕ್ ಮಾಗ್ಣಿಂ ಭೆಟಯ್ಲಿಂ.
ಉಪ್ರಾಂತ್ ಫಿರ್ಗಜ್ ಹೊಲಾಂತ್ ಯುವ ಸಮಾವೇಶ್ ಚಲಯ್ಲೊ. ಸುರ್ವಿಲ್ಲ್ಯಾ ಉದ್ಘಾಟನಾ ಉಪ್ರಾಂತ್ ಡಾ. ಮನೋಜ್ ಡಿಲೀಮಾ ಹಾಣಿಂ ಮೌಲ್ಯಾಧಾರಿತ್ ವಿಷಯಾಂನಿ ಭರ್‌ಲ್ಲ್ಯಾ ಖೆಳಾ ಮುಖಾಂತ್ರ್ ಯುವಜಣಾಂಕ್ ನವ್ಯಾ ಹುರುಪಾನ್ ಭರ‌್ಲೆಂ. ತ್ಯಾ ನಂತರ್ ಪ್ರಮುಖ್ ಭಾಷಣ್‌ಕಾರ್ ಜಾವ್ನ್ ಹಾಜರ್ ಜಾಲ್ಲ್ಯಾ ಸಿ. ಐಲಿನ್ ಮಥಾಯಸ್ ಹಾಣಿಂ, ಆಜ್ ಕಾಲ್ ಸಂಸಾರಾಂತ್ ಚಡ್ ಪ್ರಯೋಗ್ ಕರ‌್ನ್ ಆಸ್ಚ್ಯಾ social media ಆನಿ ಇತರ್ ಸಂಪರ್ಕ್ ಮಾಧ್ಯಮಾಂಚೊ ಬರೊ ಉಪಯೋಗ್ ಕರುಂಕ್ ಆನಿ ತಾಂಚೆ ವರ್ವಿಂ ಜಾಂವ್ಚಾ ದುಷ್ಪರಿಣಾಮಾ ವಿಶ್ಯಾಂತ್ ಜಾಗ್ರುತ್ ಸಾಂಬಾಳುಂಕ್ ಉಲೊ ದಿಲೊ.
ಉಪ್ರಾಂತ್ ಯುವಜಣಾಂ ಥಾವ್ನ್ ಆಕರ್ಷಕ್ ಮನೋರಂಜನ್ ಕಾರ್ಯಕ್ರಮ್ ಆನಿ ಖೆಳ್-ಪಂದ್ಯಾಟ್ ಆಸಾ ಕೆಲ್ಲೆ.
ಹ್ಯಾ ವೆಳಿಂ Miss Teen International Princess - 2023 ಜಾವ್ನ್ ವಿಂಚುನ್ ಆಯಿಲ್ಲ್ಯಾ ಕುಮಾರಿ ಸ್ವೀಝಲ್ ಫುರ್ಟಾಡೊ ಹಾಕಾ ಗೌರವ್ ಪಾಟಯ್ಲೊ.
ನಿಮಾಣೆಂ, ವಿಗಾರ್ ಬಾಪಾಂಚ್ಯಾ ಮುಖೇಲ್ಪಣಾರ್ ಹಾಜರ್ ಆಸ್‌ಲ್ಲ್ಯಾ ಸರ್ವ್ ಯುವಜಣಾಂಕ್ ಬರೊ ಫುಡಾರ್ ಮಾಗ್ಲೊ ಆನಿ ಜೀವನಾಂತ್ ಸಮಸ್ಯೆ, ಸಂಕಷ್ಟ್ ಆಯ್ಲೆಲ್ಲ್ಯಾ ವೆಳಾರ್ ಧಯ್ರ್ ಸಾಂಡಿನಾಸ್ತಾನಾ ದೆವಾಚೆರ್ ಅಖಂಡ್ ಪಾತ್ಯೆಣಿ ದವರುನ್ ಮುಕಾರ್ ಸರುಂಕ್ ಉಲೊ ದಿಲೊ. ಕಾರ್ಯಕ್ರಮಾಚ್ಯಾ ಸುರ್ವೆರ್ ICYMಚೆಂ ಅಧ್ಯಕ್ಷಿಣ್ ಕುಮಾರಿ ಜಾಸ್ಮಿನ್ ಡಿಸೋಜ ಹಾಣೆಂ ಸರ್ವಾಂಕ್ ಸ್ವಾಗತ್ ಮಾಗ್ಲೊ ಆನಿ ಅಖೇರಿಕ್ YCSಚೊ ಅಧ್ಯಕ್ಷ್ ವಿಶ್ವಾಸ್ ಕರ್ವಾಲ್ಲೊ ಹಾಣೆಂ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ.
ಹ್ಯಾ ಕಾರ್ಯಕ್ರಮಾಂತ್ ವಸ್ತೆ ಯಾಜಕ್ ಬಾಪ್ ರೊಲ್ವಿನ್ ಫೆರ್ನಾಂಡಿಸ್, ಕೊವೆಂತಾಚಿ ವ್ಹಡಿಲ್ನ್ ಸಿ. ಜಾಸ್ಮಿತಾ ಕ್ರಾಸ್ತಾ ಆನಿ ಸಾಂಗಾತಿ ಧರ್ಮ್‌ಭಯ್ಣಿಂ, ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಮಾನೆಸ್ತ್ ಜೋಸೆಫ್ ಫೆರ್ನಾಂಡಿಸ್, ಗೊವ್ಳಿಕ್ ಆಯೊಗಾಂಚೊ ಸಂಯೋಜಕ್ ಮಾನೆಸ್ತ್ ಹೆರಾಲ್ಡ್‌ ಡಿಸೋಜ, ಯುವ ಸಚೇತಕ್ ಮಾನೆಸ್ತ್ ಪ್ರವೀಣ್ ಕರ್ವಾಲ್ಲೊ ಆನಿ ಇತರ್ ಮುಖೆಲಿ ಹಾಜರ್ ಆಸೊನ್ ಕಾರ್ಯಾಚ್ಯಾ ಯಶಸ್ವೆಕ್ ಪಾಟಿಂಬೊ ದಿಲೊ.
