ಆಮ್ಚ್ಯಾ ಫಿರ್ಗಜೆಂತ್ ವಸ್ತೆ ಯಾಜಕ್ ಜಾವ್ನ್ ಸೆವಾ ದೀವ್ನ್ ಆಸ್‌ಲ್ಲೆ ಬಾಪ್ ರೊಲ್ವಿನ್ ಫೆರ್ನಾಂಡಿಸ್ ಯೆತಾ ತ್ಯಾ ಬುಧ್ವಾರಾ (21/08/24) ಪಾಂಗ್ಳಾ ಫಿರ್ಗಜೆಚೆ ಸಹಾಯಕ್ ವಿಗಾರ್ ಜಾವ್ನ್ ವೆಚ್ಯಾ ವಗ್ತಾ, ಆಜ್ ಸಕಾಳಿಂಚ್ಯಾ ಮಿಸಾ ಉಪ್ರಾಂತ್ ತಾಂಕಾಂ ಬರೆಂ ಮಾಗ್ಚೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ.
ಸುರ್ವೆರ್ ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಮಾನೆಸ್ತ್ ಜೊಸ್ಸಿ ಫೆರ್ನಾಂಡಿಸ್ ಹಾಣಿಂ ಬಾಪ್ ರೊಲ್ವಿನಾನ್ ಫಿರ್ಗಜೆಂತ್ ದಿಲ್ಲಿ ಸೆವಾ ವಾಖಣ್ಲಿ. ಯುವಜಣಾಂಕ್ ದಿಲ್ಲ್ಯಾ ಮಾರ್ಗದರ್ಶನಾಕ್ ಶಾಭಾಸ್ಕಿ ಪಾಟಯ್ಲಿ. ತಶೆಂಚ್ ಸರ್ವ್ ಫಿರ್ಗಜ್‌ಗಾರಾಂ ತರ್ಫೆನ್ ತಾಂಚ್ಯಾ ಮುಕ್ಲ್ಯಾ ಮಿಸಾಂವಾಕ್ ಬರೆಂ ಮಾಗ್ಲೆಂ. ಉಪ್ರಾಂತ್ ವಿಗಾರ್ ಬಾಪ್ ರೊನಾಲ್ಡ್ ಮಿರಾಂದಾ ಹಾಣಿಂ ತಾಂಕಾಂ ಶಾಲ್ ಪಾಂಗರ‌್ನ್ ಸನ್ಮಾನ್ ಕೆಲೊ. ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಮಾನೆಸ್ತ್ ಜೊಸ್ಸಿ ಫೆರ್ನಾಂಡಿಸ್ ಹಾಣಿಂ ಫಿರ್ಗಜ್‌ಗಾರಾಂನಿ ದಿಲ್ಲಿ ಮೊಗಾಚಿ ಕಾಣಿಕ್ ಹಾತಾಂತರ್ ಕೆಲಿ. ಕಾರ್ಯದರ್ಶಿ ಮಾನೆಸ್ತ್ ಎರಿಕ್ ಸೋನ್ಸ್ ಹಾಣಿಂ ಫುಲಾಂ ತುರೊ ಅರ್ಪಿಲೊ.
ಉಪ್ರಾಂತ್ ವಿಗಾರ್ ಬಾಪಾಂನಿ, ಬಾಪ್ ರೊಲ್ವಿನ್ ಹಾಂಚ್ಯಾ ಸಾಂಗಾತಾ ಆಪ್ಲೊ ಅನುಭವ್ ಉಚಾರ‌್ನ್ ತಾಂಕಾಂ ಬರೆಂ ಮಾಗ್ಲೆಂ. ICYMಚ್ಯಾ ತರ್ಫೆನ್ ಅಧ್ಯಕ್ಷಿಣ್ ಸಿಯೊಲಾ ಪಿಂಟೊ ಆನಿ ಕಾರ್ಯದರ್ಶಿ ರಿಶೋನ್ ಬಾರ್ನೆಸ್ ಹಾಣಿಂ ಬಾಪ್ ರೊಲ್ವಿನಾಕ್ ಮೊಗಾಚಿ ಕಾಣಿಕ್ ದಿಲಿ.
ತ್ಯಾ ನಂತರ್ ಬಾಪ್ ರೊಲ್ವಿನ್ ಫೆರ್ನಾಂಡಿಸ್ ಹಾಣಿಂ ಆಪ್ಲ್ಯಾ ಸಂದೇಶಾಂತ್ ಫಿರ್ಗಜ್‌ಗಾರಾಂನಿ ದಿಂವ್ಚಿ ಖಳ್ಮಿತ್ ನಾತ್‌ಲ್ಲಿ ಸೆವಾ ವಾಖಣ್ಲಿ ತಶೆಂಚ್ ತಾಣಿಂ ದಿಲ್ಲ್ಯಾ ಸಹಕಾರಾಕ್ ಉಪ್ಕಾರ್ ಬಾವುಡ್ಲೊ. ಉಪ್ರಾಂತ್ ಸರ್ವ್ ಗುರ್ಕಾರಾಂನಿ ಬಾಪ್ ರೊಲ್ವಿನಾಕ್ ಬರೆಂ ಮಾಗ್ಲೆಂ.
ಹ್ಯಾ ಕಾರ್ಯಾಕ್ ವಿಗಾರ್ ಬಾಪ್ ರೊನಾಲ್ಡ್ ಮಿರಾಂದಾ, ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಮಾನೆಸ್ತ್ ಜೊಸ್ಸಿ ಫೆರ್ನಾಂಡಿಸ್ ಆನಿ ಕಾರ್ಯದರ್ಶಿ ಮಾನೆಸ್ತ್ ಎರಿಕ್ ಸೋನ್ಸ್ ಹಾಜರ್ ಆಸ್‌ಲ್ಲೆ. ಮಾನೆಸ್ತ್ ಎರಿಕ್ ಸೋನ್ಸಾನ್ ಹೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ.
Pictures by : Herbert Menezes, Barkur
