ಆಮ್ಚ್ಯಾ ದಿಯೆಸೆಜಿಚ್ಯಾ ಸುವಾರ್ತಾ ಪರ್ಗಟ್ಣಿ ಆನಿ ಪ್ರಸಾರ್ ಆಯೊಗಾಖಾಲ್, ಕಲ್ಲ್ಯಾನ್ಪುರ್ ವಾರಾಡ್ಯಾ ಮಟ್ಟಾರ್ ಆಮ್ಚಾ ಫಿರ್ಗಜೆಂತ್ ಆಜ್ (ಸುಕ್ರಾರ್, 12/08/2022) ಸಕಾಳಿಂ 9:30 ವರಾರ್ ಥಾವ್ನ್ ಅರ್ಗಾಂ-ಸ್ತುತಿ-ಹೊಗ್ಳಾಪ್, ವಿನವ್ಣೆಚಿಂ ಮಾಗ್ಣಿಂ ಆನಿ ಸಾಕ್ರಾಮೆಂತಾಚೆಂ ಆರಾಧನ್, ದಿಯೆಸೆಜಿಚ್ಯಾ ಆಯೊಗಾಚೊ ದಿರೆಕ್ತೊರ್, ಬಾಪ್ ವಿನ್ಸೆಂಟ್ ಕ್ರಾಸ್ತಾ ಹಾಣಿಂ ಭೋವ್ಚ್ ಆಪುರ್ಬಾಯೆನ್ ಚಲವ್ನ್ ವ್ಹೆಲೆಂ. ತಾಂಕಾಂ ಹ್ಯಾ ಭಕ್ತಿಕ್ ಕಾರ್ಯಾಂತ್ ದಿಯೆಸೆಜಿಚ್ಯಾ ದೇವ್ಸ್ತುತಿ ಕೇಂದ್ರಾಚೊ ದಿರೆಕ್ತೊರ್, ಬಾಪ್ ಸಿರಿಲ್ ಲೋಬೊ ಹಾಣಿಂ ಆಪ್ಲ್ಯಾ ಘಣ್ಘಣಿತ್ ಪ್ರಸಂಗಾಂನಿ ಆನಿ ಮಧುರ್ ಗಿತಾಂನಿ ಸಾಂಗಾತ್ ದಿಲೊ. ದಿಯೆಸೆಜಿಚ್ಯಾ ಕಾರಿಜ್ಮಾತಿಕ್ ಪಂಗ್ಡಾಚೆ ಹೆರ್ ಭಾವ್ಯೀ ಹ್ಯಾ ಮಾಗ್ಣ್ಯಾವಿಧಿಚ್ಯಾ ಹೆರ್ ವಾಂಟ್ಯಾಂನಿ ಮುಕೆಲ್ಪಣ್ ಘೆವುನ್ ಆಸ್ಲೆ. 2:45 ಘಂಟ್ಯಾಂಚ್ಯಾ ಪ್ರಭಾವಿತ್ ಮಾಗ್ಣ್ಯಾ'ರಾಧಾನಾ ಆನಿ ಸಾಕ್ರಾಮೆಂತಾಚ್ಯಾ ಆಶಿರ್ವಾದಾ ಉಪ್ರಾಂತ್ ಪಾದ್ರೆ ಪಿಯೊಚೆಂ ನೊವೆನ್ ಚಲವ್ನ್ ವ್ಹೆಲೆಂ. ಮಿಸಾಚ್ಯಾ ಪವಿತ್ರ್ ಬಲಿದಾನಾ ಉಪ್ರಾಂತ್ ಜೆಜುಚ್ಯಾ ಪವಿತ್ರ್ ಕಾಳ್ಜಾಚೆಂ ನೊವೆನ್ಯೀ ಚಲವ್ನ್ ವ್ಹೆಲೆಂ. ಫಿರ್ಗಜ್ಗಾರಾಂ ಸಂಗಿಂ ವಾರಾಡ್ಯಾಚೆ ಜಾಯ್ತೆ ಭಕ್ತಿಕ್ಯೀ ಹ್ಯಾ ಭಕ್ತಿಪಣಾಕ್ ಹಾಜರ್ ಜಾಲ್ಲೆ. ಆಮ್ಚ್ಯಾ ಫಿರ್ಗಜೆಚ್ಯಾ ಸುವಾರ್ತಾ ಪರ್ಗಟ್ಣಿ ಆನಿ ಪ್ರಸಾರ್ ಆಯೊಗಾಚಿ ಸಂಚಾಲಕಿ ಮಾನೆಸ್ತಿಣ್ ಜೆಸ್ಸಿ ಮಿನೇಜಸ್ ಹಿಚ್ಯಾ ಮುಕೆಲ್ಪಣಾರ್, ಆಯೊಗಾಚ್ಯಾ ಸಾಂದ್ಯಾಂನಿ ಭೋವ್ ಆಪುರ್ಬಾಯೆನ್ ಹ್ಯಾ ಮಾಗ್ಣ್ಯಾವಿಧಿಂತ್ ಸಾಂಗಾತ್ ದಿಲ್ಲೊ.
ನಿಮಾಣೆಂ ಸರ್ವಾಂಕ್ ದನ್ಪಾರಾಂಚ್ಯಾ ಜೆವ್ಣಾಚಿ ಮಾಂಡಾವಳ್ ಕೆಲ್ಲಿ.
ಫಿರ್ಗಜ್ ಗೊವ್ಳಿಕ್ ಮಂಡಳಿಚೊ ಉಪಾಧ್ಯಕ್ಷ್ ಮಾನೆಸ್ತ್ ಹೆರಾಲ್ಡ್ ಡಿಸೋಜಾ, ಕಾರ್ಯದರ್ಶಿ ಮಾನೆಸ್ತಿಣ್ ವಿವೆಟ್ ಲುವಿಸ್ ಆನಿ ಗೊವ್ಳಿಕ್ ಆಯೊಗಾಂಚೊ ಸಂಯೋಜಕ್ ಮಾನೆಸ್ತ್ ಎರಿಕ್ ಸೋನ್ಸ್ ಹಾಂಚೊ ವಾವ್ರ್, ಹ್ಯಾ ಭಕ್ತಿಕ್ ಕಾರ್ಯಾಚ್ಯಾ ಮಾಂಡಾವಳೆ ಪಾಟಿಂ ಆಸ್ಲ್ಲೊ.
