ಬಾರ್ಕುರ್ ಫಿರ್ಗಜೆಂತ್ 5 ವರ್ಸಾಂ (ಜೂನ್ 3, 2012 ಥಾವ್ನ್ ಜೂನ್ 6, 2017) ವಿಗಾರ್ ಜಾವ್ನ್ ಆಪುರ್ಬಾಯೆಚಿ ಸೆವಾ ದೀವ್ನ್ ಮಹಿನ್ಯಾ ಪಯ್ಲೆಂ (ಜುಲೈ 3, 2024) ಕಲ್ಲ್ಯಾನ್ಪುರಾಂತ್ ದೆವಾದಿನ್ ಜಾಲ್ಲ್ಯಾ ಮಾ. ಬಾ. ವಲೇರಿಯನ್ ಮೆಂಡೊನ್ಸಾ ಹಾಂಚಾ ಅತ್ಮ್ಯಾ ಖಾತಿರ್ ಆಜ್ ಮಿಸಾಚೆಂ ಭೆಟವ್ನ್, ಶ್ರದ್ಧಾಂಜಲಿ ಪಾಟವ್ಚೆಂ ಕಾರ್ಯಕ್ರಮ್ ಬಾರ್ಕುರ್ ಫಿರ್ಗಜೆಂತ್ ಚಲವ್ನ್ ವ್ಹೆಲೆಂ. ಮಿಸಾಚ್ಯಾ ಸುರ್ವೆರ್ ವಿಗಾರ್ ಬಾಪ್ ರೊನಾಲ್ಡ್ ಮಿರಾಂದಾ ಹಾಣಿಂ ಮಾಗ್ಣ್ಯಾವಿಧಿ ಚಲವ್ನ್ ವ್ಹೆಲಿ. ಮಾ. ಬಾ. ಬೊನಿಫಾಸ್ ಪಿಂಟೊ ಹಾಣಿಂ ವಿಗಾರ್ ಬಾಪಾ ಸಂಗಿಂ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ.
ಮಿಸಾ ಉಪ್ರಾಂತ್ ಫಿರ್ಗಜ್ಗಾರಾಂ ತರ್ಫೆನ್ ಗೊವ್ಳಿಕ್ ಆಯೊಗಾಂಚೊ ಸಂಯೋಜಕ್ ಮಾನೆಸ್ತ್ ಹೆರಾಲ್ಡ್ ಡಿಸೋಜ ಹಾಣಿಂ ಶ್ರದ್ಧಾಂಜಲಿ ಭೆಟಯ್ಲಿ. ಫಾದರ್ ವಲ್ಲಿನ್ ಬಾರ್ಕುರ್ ಫಿರ್ಗಜೆಂತ್ ಸೆವಾ ದೀವ್ನ್ ಆಸ್ತಾನಾ ಕ್ರಿಸ್ತಾಂವ್ ತಶೆಂಚ್ ಅಕ್ರಿಸ್ತಾಂವ್ ಭಾವ್ಡಾಂ ಸಾಂಗಾತಾ ತಾಂಚೆ ಮೆತೆರ್ಪಣ್, ಫಿರ್ಗಜೆಂತ್ಲ್ಯಾ ಸರ್ವ್ ಕುಟ್ಮಾಂ ಸಾಂಗಾತಾ ತಾಂಚಿ ಸಳಾವಳ್, ಫಿರ್ಗಜೆಂತ್ ತಾಂಚ್ಯಾ ಮುಕೇಲ್ಪಣಾರ್ ಜಾಲ್ಲ್ಯಾ ಅಭಿವೃದ್ಧೆಚೊ ಉಲ್ಲೇಖ್ ಕೆಲೊ, ಪರ್ಗಾಂವಾಂತ್ ವಸ್ತಿ ಕರ್ಚ್ಯಾ ಬಾರ್ಕುರ್ಗಾರಾಂಕ್ ಎಕ್ವಟುಂಕ್ ತಾಣಿಂ ಕಾಡ್ಲ್ಲ್ಯಾ ಮ್ಹಿನತೆಚೊ ಉಗ್ಡಾಸ್ ಕಾಡ್ಲೊ. ಬಾರ್ಕುರ್ ಫಿರ್ಗಜೆಕ್ ಬಾಪ್ ವಲೇರಿಯನ್, ಎಕ್ ದೆಣೆಂ ಜಾವ್ನ್ ಫಾವೊ ಕೆಲ್ಲ್ಯಾ ಧನ್ಯಾ ದೆವಾಕ್ ಅರ್ಗಾಂ ಪಾಟಂವ್ಚಾ ಸವೆಂ ಮೊಗಾನ್ ಆನಿ ಗೌರವಾನ್ ಶ್ರದ್ಧಾಂಜಲಿ ಪಾಟಯ್ಲಿ.
ಉಪ್ರಾಂತ್ ಯಾಜಕ್ ಭಾವಾಂನಿ, ಧರ್ಮ್ ಭಯ್ಣ್ಯಾಂನಿ ಆನಿ ಫಿರ್ಗಜ್ಗಾರಾಂನಿ ಮಾನಾನ್ ಫುಲಾಂ ಅರ್ಪಿಲಿಂ.
Pictures by : Herbert Menezes, Barkur
